རྗེ་མི་ལའི་གསུང་།
米拉日巴道歌
གཞས་ཚིག:མི་ལ་རས་པ།
词：米拉热巴
གཞས་གདངས:གངས་དཀར་ཟླ་བ།
曲：贡尕达哇
གཞས་པ:གངས་དཀར་ཟླ་བ།
演唱：贡尕达哇
བདག་གི་ཞལ་མཐོང་གསུང་ཐོས་དང་།
རྣམ་ཐར་ཡིད་ལ་དྲན་པ་དང་།
མཚན་ནམ་རྣམ་ཐར་ཐོས་ཚད་རྣམས།
མངོན་དགའི་ཞིང་དུ་མཇལ་བར་ཤོག
གང་ཞིག་བདག་གི་རྣམ་ཐར་ལ།
འབྲི་ཞིང་འཆད་ཉན་བྱེད་པ་དང་།
ཀློག་དང་ཕྱག་མཆོད་འབུལ་བ་རྣམས།
མངོན་དགའི་ཞིང་དུ་མཇལ་བར་ཤོག
མི་ལ་བཞད་པ་རྡོ་རྗེ་མཁྱེན།
ཁྱེད་ཀྱི་ཞབས་ལ་གསོལ་བ་འདེབས།
ཀློག་དང་ཕྱག་མཆོད་འབུལ་བ་རྣམས།
མངོན་དགའི་ཞིང་དུ་མཇལ་བར་ཤོག
མ་འོངས་གང་ཟག་ཐམས་ཅད་ལ།
གལ་ཏེ་སྒོམ་པ་ནུས་སྲིད་ན།
ཁོ་བོའི་དཀའ་བ་སྤྱད་སྤྱད་པས།
གེགས་དང་གོལ་ས་མེད་པར་ཤོག
ཆོས་ཕྱིར་དཀའ་ཐུབ་སྤྱོད་པ་ལ།
བསོད་ནམས་དཔག་ཏུ་མེད་པ་ཡོད།
ཁོ་བོའི་རྣམ་ཐར་ཐོས་པ་ལ།
བྱིན་རླབས་དཔག་ཏུ་མེད་པ་ཡོད།
མི་ལ་བཞད་པ་རྡོ་རྗེ་མཁྱེན།
ཁྱེད་ཀྱི་ཞབས་ལ་གསོལ་བ་འདེབས།
ཁོ་བོའི་རྣམ་ཐར་ཐོས་པ་ལ།
བྱིན་རླབས་དཔག་ཏུ་མེད་པ་ཡོད།
བདག་གི་གནས་དང་གནས་མལ་དང་།
དངོས་པོ་མཆིས་པ་ཐམས་ཅད་ཀྱིས།
གར་སོང་ཡུལ་དུ་བདེ་སྐྱིད་ཤོག
གར་སོང་ཡུལ་དུ་བདེ་སྐྱིད་ཤོག
ས་དང་ཆུ་དང་མེ་དང་རླུང་།
ནམ་མཁའ་འབྱུང་བས་གར་ཁྱབ་པ།
དེ་བཞིན་བདག་གིས་ཁྱབ་པར་ཤོག
དེ་བཞིན་བདག་གིས་ཁྱབ་པར་ཤོག
མི་ལ་བཞད་པ་རྡོ་རྗེ་མཁྱེན།
ཁྱེད་ཀྱི་ཞབས་ལ་གསོལ་བ་འདེབས།
དེ་བཞིན་བདག་གིས་ཁྱབ་པར་ཤོག
དེ་བཞིན་བདག་གིས་ཁྱབ་པར་ཤོག
ལྷ་ཀླུ་ལ་ཕྱོགས་སྡེ་བརྒྱད་དང་།
དེ་བཞིན་གཞི་བདག་འབྱུང་པོའི་ཚོགས།
གནོད་པ་སྐད་ཅིག་མི་སྐྱེལ་ཞིང་།
བསམ་པ་ཆོས་བཞིན་འགྲུབ་པར་ཤོག
སྲོག་ཆགས་སྲིན་བུ་ལ་ཕྱོགས་པ།
གཅིག་ཀྱང་འཁོར་བར་མི་ལྟུང་ཞིང་།
མ་ལུས་ང་ཡིས་འདྲེན་པར་ཤོག
མ་ལུས་ང་ཡིས་འདྲེན་པར་ཤོག
མི་ལ་བཞད་པ་རྡོ་རྗེ་མཁྱེན།
ཁྱེད་ཀྱི་ཞབས་ལ་གསོལ་བ་འདེབས།
མ་ལུས་ང་ཡིས་འདྲེན་པར་ཤོག
མ་ལུས་ང་ཡིས་འདྲེན་པར་ཤོག